ເນມາຣ ສູນໜ້າທີມຊາດເບຣຊິນ ໄວ 31 ປີ ໄດ້ສຳຜັດກັບການແຂ່ງຂັນ ເອເອັຟຊີ ແຊ້ມປ້ຽນລີກ ຄັ້ງທຳອິດ ກັບສັງກັດໃໝ່ ອາວ ຮີລານ ທີມດັງໃນລີກສູງສຸດຂອງ ຊາອຸດິອາຣາເບຍ ນັດເປີດສະໜາມຮອບແບ່ງກຸ່ມລະດູການໃໝ່ ທີ່ຕົ້ນສັງກັດເປີດບ້ານສະເໝີກັບ ນາຟບາຮໍ ນ້ອງໃໝ່ຈາກອຸສເບກິສຖານ 1-1.
ເນມາຣ ໄດ້ເປັນຕົວຈິງ ແລະ ໄດ້ຫລິ້ນຈົນຈົບເກມ ສາມາດກົດດັນປັ່ນປ່ວນເກມຮັບຂອງຄູ່ຕໍ່ສູ້ຫລາຍສົມຄວນ ແຕ່ຫາຈັງຫວະຍິງປະຕູລຳບາກ ຍ້ອນຖືກຈັບເປັນພິເສດ ເຊິ່ງເກມນີ້ ທີມຢາມໄດ້ປະຕູນຳກ່ອນນາທີ 52′ ແຕ່ເຈົ້າບ້ານທວງຄືນໄລຍະຕໍ່ເວລາບາດເຈັບທ້າຍເກມ ນາທີ 90+10′ ຈາກກອງຫລັງຊາວຊາອຸ: ອາລີ ອາວ ບູໄລຮີ ໄດ້ໜຶ່ງຄະແນນແບບຫວຸດວິດ.
ເນມາຣ ຍ້າຍຈາກ ປາຣີ ແຊັງແຊກແມັງ ມາຢູ່ກັບ ອາວ ຮີລານ ໃນວັນທີ 15 ສິງຫາຜ່ານມາ ດ້ວຍຄ່າໂຕປະມານ 90 ລ້ານເອີໂຣ ເຊັນສັນຍາ 2 ປີ ຫາກໍລົງຫລິ້ນ 2 ນັດ ຈັດ 2 ແອັສຊິດ. ນັດຕໍ່ໄປ ເນມາຣ ຈະພາທີມໄປຢາມ ດາມັກ ໃນເກມລີກຊາອຸດິ ວັນທີ 21 ກັນຍານີ້.
Photo: نادي الهلال السعودي – AlHilal Saudi Club