ການແຂ່ງຂັນລົດສູດໜຶ່ງ ຟໍຣມູລ້າວັນ ສະໜາມທີ 15 ຂອງປີ ລາຍການ ສິງກະໂປ ກຣັງປຣີ ທີ່ສະໜາມ Marina Bay Street Circuit, ປະເທດສິງກະໂປ ໃນທ້າຍອາທິດຜ່ານມາ, ຄວາມຍາວຕໍ່ຮອບ 4.940 ແມັດ ແຂ່ງທັງໝົດ 62 ຮອບ.
ປະກົດວ່າ: ຄາຣລັອສ ເຊັນ ນັກຂັບຊາວສະເປນ (ແອັສປາຍ) ຈາກຄ້າຍເຟີຣາຣີ້ ອອກໂຕເປັນຄົນທຳອິດ ແລະ ປະຄອງລົດຄູ່ໃຈເຂົ້າເສັ້ນໄຊ ດ້ວຍເວລາ 1 ຊົ່ວໂມງ 46 ນາທີ 37.418 ວິນາທີ ເອົາຊະນະ ຊານໂດຣ ນໍຣຣີ້ ນັກຂັບຊາວສະຫະຣາຊອານາຈັກ ຈາກທີມແມັກຄາເຣນ ເມີຊີເດັສ 0.812 ວິນາທີ, ຄາຣລັອສ ເຊັນ ຄວ້າແຊ້ມເປັນສະໜາມທຳອິດຂອງປີນີ້ ແລະ ຢຸດສະຖິຕິຂອງ ແມັກ ເວີສະເຕັບເປິ້ນ ຊະນະລວດໄວ້ທີ 10 ສະໜາມ ໂດຍ ເວີສະເຕັບເປິ້ນ ເວລາໃນຮອບຄັດເລືອກບໍ່ດີ ອອກໂຕເປັນຄົນທີ 11 ແຕ່ສາມາດຈົບອັນດັບທີ 5 ຕາມຫລັງ 21.441 ວິນາທີ.
ຂະນະທີ່ ທີມເຣດບລູ ເຣຊິ້ງ ຮອນດ້າ ຕົ້ນສັງກັດຂອງ ເວີສະເຕັບເປິ້ນ ກໍຖືກຢຸດສະຖິຕິຄວ້າແຊ້ມ F1 ຕໍ່ເນື່ອງໄວ້ທີ່ 15 ສະໜາມຕິດຕໍ່ກັນ ເຊິ່ງເປັນສະຖິຕິສູງສຸດໃນປະຫວັດສາດ F1.
ສຳລັບ ລຸຍ ຮາມິນຕັນ ແຊ້ມໂລກ 7 ສະໄໝ ຈົບອັນດັບທີ 3 ຕາມຫລັງ 1.269 ວິນາທີ, ເຟີນັນໂດ ອາລອນໂຊ້ ແຊ້ມໂລກ 2 ສະໄໝ ຈົບອັນດັບທີ 15
ປັດຈຸບັນ ຟໍຣມູລ້າວັນ ປີ 2023 ຜ່ານໄປ 15 ສະໜາມ ເວີສະເຕັບເປິ້ນ ຍັງເປັນຜູ້ນຳຄະແນນລວມນັກຂັບຢ່າງໜຽວແໜ້ນ ມີ 374 ຄະແນນ, ອັນດັບສອງ ເຊີຈີໂອ້ ເປເຣັຊ ເພື່ອນຮ່ວມທີມ ມີ 223 ຄະແນນ, ອັນດັບ 3 ລຸຍ ຮາມິນຕັນ ມີ 180 ຄະແນນ.
ທີມຜູ້ສ້າງທີມນຳຍັງຄົງແມ່ນ ເຣດບລູ ເຣຊິ້ງ ຮອນດ້າ ຍຶດຕຳແໜ່ງທີມນຳຢ່າງສະຫງ່າ ມີ 597 ຄະແນນ, ອັນດັບສອງ ເມີຊີເດັຊ ມີ 289, ທີ 3 ເຟີຣາຣີ້ ມີ 265 ຄະແນນ.
F1 ສະໜາມຕໍ່ໄປ ສະໜາມທີ 16 ຂອງປີ ລາຍການ ເຈແປນນິສ ກຣັງປຣີ ທີ່ສະໜາມ Suzuka International Racing Course, ປະເທດຍີ່ປຸ່ນ ຈະແຂ່ງຂັນວັນທີ 22-24 ກັນຍານີ້.
Photo: F1