ງານບຸນອອກພັນສາປະວໍລະນາ ແລະ ຊ່ວງເຮືອປະເພນີ ປະຈໍາປີ 2022 ທີ່ທ່າວັດຈັນ ເມືອງຈັນທະບູລີ ນະຄອນຫຼວງວຽງຈັນ ຈະຈັດຂຶ້ນໃນວັນທີ 8-11 ຕຸລານີ້

ທ່ານ ດວງຕາ ສຸລິວົງ ເຈົ້າເມືອງຈັນທະບູລີ, ປະທານຄະນະກໍາມະການຈັດງານບຸນອອກພັນສາປະວໍລະນາ ແລະ ຊ່ວງເຮືອປະເພນີ ປະຈໍາປີ 2022 ທີ່ທ່າວັດຈັນ ນະຄອນຫຼວງວຽງຈັນ ໄດ້ຖະແຫຼງຂ່າວໃຫ້ຮູ້ວ່າ: ງານບຸນປີນີ້ ຈະຈັດຂຶ້ນໃນລະຫວ່າງວັນທີ 8-11 ຕຸລາ 2022 ໂດຍຈະຈັດໃຫ້ຍິ່ງໃຫຍ່ ໄດ້ເນື້ອໃນ ສົມກັບການລໍຄອຍຂອງປວງຊົນລາວ ໂດຍສະເພາະຊາວນະຄອນຫລວງວຽງຈັນ ແລະ ບັນດາສີພາຍ ຈະໄດ້ປະລອງກຳລັງ ແລະ ຮ່ວມກັນຮັກສາ ສືບທອດ ສົ່ງເສີມ ວັດທະນະທຳ ຮີດຄອງປະເພນີອັນດີງາມຂອງຊາດລາວ ໃຫ້ຢູ່ຄູ່ກັບຄົນລາວ ແລະ ສັງຄົມລາວຕະຫລອດໄປ.

ພິເສດສະເພາະການແຂ່ງຂັນຊ່ວງເຮືອປະເພນີປີນີ້ ຈະມີເຮືອຊ່ວງຈາກຕ່າງແຂວງເຂົ້າມາຮ່ວມສ້າງສີສັນ ແລະ ຊິງເຈົ້າທ່າ ເປັນຕົ້ນແຂວງວຽງຈັນ, ໄຊຍະບູລີ ແລະ ແຂວງຫລວງພະບາງ, ຄາດວ່າຈະເຮືອຊ່ວງເຂົ້າຮ່ວມບໍ່ຕໍ່າກວ່າ 20 ລຳ, ໃນນີ້ແບ່ງເປັນ 3 ປະເພດຄື: ເຮືອ 12 ສີພາຍ ແລະ ເຮືອປະເພນີຍິງ-ຊາຍ 55 ສິພາຍ.

ປະທານຄະນະກໍາມະການຈັດງານຍັງໃຫ້ຮູ້ຕື່ມອີກວ່າ: ອີກສິ່ງໜຶ່ງທີ່ພິເສດໃນງານບຸນປີນີ້ ແມ່ນຈະມີບັນດາທຸລະກິດ, ບໍລິສັດຫ້າງຮ້ານຕ່າງໆ ທີ່ເປັນຕົວຂັບເຄື່ອນສຳຄັນໃນການຊຸກດັນ ພັດທະນາເສດຖະກິດຂອງລາວ ມາວາງສະແດງ, ຈໍາໜ່າຍສິນຄ້າ ແລະ ໂຄສະນາ ປະຊາສຳພັນ ໃຫ້ສັງຄົມໄດ້ຮັບຮູ້ ພ້ອມກັນນີ້ ກໍຈະມີການຂາຍສິນຄ້າຜະລິດຕະພັນຕ່າງໆ ໂດຍສະເພາະສິນຄ້າພາຍໃນທີ່ເປັນຂອງ​ທ້ອງຖິ່ນ, ບ້ານ, ເມືອງ, ຂອງຄົວຄອບຕົວແບບ, ​ສິນຄ້າ​ໂອດ​ອບ ເພື່ອເປັນສົ່ງ​ເສີມ​ຫົວໜ່ວຍ​ທຸລະ​ກິດຕ່າງໆ ໃຫ້​ນັບ​ມື້​ເຕີບ​ໃຫຍ່​ຂະຫຍາຍຕົວຢ່າງກວ້າງຂວາງ, ຄາດວ່າຈະມີຫົວໜ່ວຍທຸລະກິດ, ຫ້າງຮ້ານ ມາວາງສະແດງ ຂາຍສິນຄ້າ, ອາຫານການກິນ ແລະ ຂາຍເຂົ້າຫຼາມປີ້ງໄກ່ຫລາຍກວ່າ 600 ຫົວໜ່ວຍທຸລະກິດ ໂດຍພື້ນທີ່ກໍານົດໃຫ້ວາງສະແດງ ແລະ ຂາຍສິນຄ້າ ແມ່ນພາຍໃນຂອບເຂດສວນເຈົ້າອານຸວົງ ແລະ​ ເສັ້ນທາງ​ເຈົ້າ​ຟ້າ​ງຸ່ມທັງ 2 ຟາກ ນັບແຕ່ໂຮງ​ແຮມ​ລ້ານ​ຊ້າງຂຶ້ນມາຫາສາມແຍກປາກປາສັກ ແລະ ເສັ້ນທາງດ້ານໜ້າ ແລະ ດ້ານຫຼັງໂຮງຮຽນປາກປ່າສັກ. ໂດຍໄດ້ຈົ່ງທາງເຂົ້າ-ອອກ ໃຫ້ມວນຊົນ ແລະ ລົດການນຳເຂົ້າມາໄດ້ຢ່າງສະດວກ ເຊິ່ງຄະນະຮັບຜິດຊອບຈັດງານແມ່ນໄດ້ຈັດສັນໃຫ້ເປັນລະບຽບກວ່າຄັ້ງຜ່ານໆມາ, ເພື່ອໃຫ້ມີພື້ນທີ່ສະດວກຂຶ້ນໃນການຍ່າງເລາະທ່ຽວຊົມ ແລະ ຊື້ສິນຄ້າຕ່າງໆ.

ງານບຸນອອກພັນສາປະວໍລະນາ ແລະ ຊ່ວງເຮືອປະເພນີຄັ້ງນີ້ ຍັງຈະຊ່ວຍສົ່ງເສີມການທ່ອງທ່ຽວລາວ ເພື່ອກະຕຸ້ນເສດຖະກິດພາຍໃນໃຫ້ດີຂຶ້ນໄປເທື່ອລະກ້າວ, ສ່ວນເລື່ອງບັນຫາລາຄາການຝາກລົດທີ່ພົບເຫັນໃນໄລຍະຜ່ານມາ ເຈົ້າໜ້າທີ່ຈະເຂັ້ມງວດກວ່າເກົ່າໃນການກວດກາ ແລະ ປັບໄໝຜູ້ໃຫ້ບໍລິການ ທີ່ເອົາລັດເອົາປຽບປະຊາຊົນຜູ້ໃຊ້ບໍລິການ.

ສຳລັບສະຖານທີ່ຈອດລົດ ແມ່ນເສັ້ນ​ທາງ 4 ແຍກທະນາຄານພັດທະນາລາວ ລົງ​ມາສີ່​ແຍກ​ໄຟ​ແດງ​ສີ​ຫອມ,ສາມແຍກໄຟແດງວັດອິນແປງ ​ເສັ້ນທາງ​ເສດ​ຖາ​ທິລາດ ໄປຫາສີ່ແຍກໄຟແດງ ວັດສີສະເກດ ເປັນບ່ອນຈອດລົດຈັກ ແລະ ລົດໃຫຍ່ບາງຈຸດ ໂດຍກຳ​ນົດເວ​ລາ​ເຂົ້າ-ອອກຂອງລົດ​ຊາວ​ຄ້າ​ຂາຍຢູ່​ງານ​ບຸນແມ່ນອະ​ນຸ​ຍາດ​ໃຫ້ເຂົ້າ​ໄດ້ແຕ່​ເວ​ລາ 4:00-6:00 ໂມງ​ເຊົ້າ ແລະ ຕອນ​ກາງ​ຄ​ືນແມ່ນ​ອະ​ນຸ​ຍາດ​ໃຫ້​ເຂົ້າໄດ້​ເວລາ 24:00 ໂມງເປັນຕົ້​ນ​ໄປ. ສ່ວນເວ​ລາ​ປິດ​ເສັ້ນ​ທາງການ​ສັນ​ຈອນ​ຊົ່ວ​ຄາວ ຢູ່​ໃນ​ຂອບ​ເຂດ​ການ​ຈັດ​ງານ​ບຸນແມ່ນ ​ເລີ່ມ​ແຕ່​ເວ​ລາ 6:00 ໂມງ​ເຊົ້າ ຫາ 24:00 ໂມງກາງຄືນ.

ສ່ວນບັນດາຂໍ້ຫ້າມຕ່າງໆໃນ​ການ​ເຂົ້າ​ຮ່ວມ​ງານ​ບຸນແມ່ນເໝືອນກັບງານຄັ້ງຜ່ານໆມາ: ຫ້າມ​ບໍ່​ໃຫ້​ມີ​ການ​ໂຄສະນາ​ທຸກ​ຮູບ​ແບບ​ທີ່​ຜິດ​ຕໍ່​ກົ​ດໝາຍຂອງ ສປປ ລາວ ລວມທັງການຂາຍ ຫຼື ນໍາ​ເອົາ​ອາວຸດ​ທຸກ​ປະ​ເພດ, ໂຄມ​ໄຟ​ລອຍ​, ​ຢາ​ເສບ​ຕິດ, ທາ​ດ​ເບື່ອ, ສານ​ເຄມີ​ທີ່​ອອກ​ລິດ​ທາງປະສາດ​ທຸກຊະນິດ, ຜະ​ລິດ​ຕະພັນ​ທີ່​ລອກ​ແບບ​ສິ້ນ​ລາວຫຼື ​ເຄື່ອງນຸ່ງ​ລາວ, ຫ້າມ​ຂາຍ ​ແລະ ນຳ​ເອົາ​ຜະລິດ​ຕະພັນວັດທະນະທໍາລາມົກ​ຕ່າງໆ, ຫ້າມ​ຫຼີ້ນ​ການ​ພະນັນທຸກ​ປະ​ເພ​ດ ​ແລະ ອາ​ລະວາ​ດຕີ​ກັນ​, ຫ້າມ​ດື່ມ​ສິ່ງ​ມຶນ​ເມົາ​ເກີນ​ຂອບ​ເຂດ ​ແລະ ອື່ນໆ ຖ້າ​ຜູ້​ໃດ​ລະ​ເມີດຈະ​ຖືກ​ເຈົ້າໜ້າທີ່​ກ່າວເຕືອນ ແລະ ປັບໄໝຕາມລະບຽບກົດໝາຍ.

Leave a Reply

Your email address will not be published.