ໃກ້ແລ້ວ!! ງານແລ່ນຮາຟມາຣາທອນ ສາມຫຼ່ຽມຄຳ ຄັ້ງທີ 3 ຊິງເງິນລາງວັນລວມ 1 ຕື້ 375 ລ້ານກີບ ຈະແຂ່ງຂັນ 26 ມິຖຸນາ 2023

ຍັງເຫຼືອອີກບໍ່ເທົ່າໃດມື້, ງານແຂ່ງຂັນແລ່ນຮາຟມາຣາທອນ ສາມຫຼ່ຽມຄຳ ຄັ້ງທີ 3 ປີ 2023 ຊິງເງິນລາງວັນລວມ 1 ຕື້ 375 ລ້ານກີບ ຈະແຂ່ງຂັນ 26 ມິຖຸນາ 2023 ຈະຈັດຂຶ້ນຢ່າງຍິ່ງໃຫຍ່ໃນວັນຕ້ານຢາເສບຕິດສາກົນ ຄົບຮອບ 36 ປີ ວັນທີ 26 ມິຖຸນານີ້ ທີ່ເຂດເສດຖະກິດພິເສດ ສາມຫຼ່ຽມຄຳ, ເພື່ອເປັນການສົ່ງເສີມການຫລິ້ນກິລາ ອອກກຳລັງກາຍໃຫ້ມີສຸຂະພາບທີ່ດີ, ຊຸກຍູ້ການທ່ອງທ່ຽວ ແລະ ຮ່ວມກັນຕໍ່ຕ້ານຢາເສບຕິດ.

ໃນໂອກາດດັ່ງກ່າວ ຍັງຈະມີການເຜີຍແຜ່ຜົນຮ້າຍຂອງສິ່ງເສບຕິດ ໃຫ້ແກ່ນ້ອງນັກຮຽນ, ຂະບວນນ້ອງນັກຮຽນຊົມຫໍວາງສະແດງຕ້ານຢາເສບຕິດ, ການຕ້ອນຮັບໜ່ວຍປະຕິບັດກົດໝາຍ ລາດຕະເວນຕາມລຳແມ່ນ້ຳຂອງ ລາວ, ຈີນ, ມຽນມາ, ໄທ ແລະ ກິດຈະກຳທີ່ຕິດພັນກັບການທ່ຽວທ່ຽວອື່ນໆອີກ.

ງານແລ່ນຮາຟມາຣາທອນ ສາມຫຼ່ຽມຄຳ ຄັ້ງນີ້ ເປັນງານແລ່ນທີ່ຊິງເງິນລາງວັນລວມຫລາຍສຸດໃນ ສປປ ລາວ ລວມ 1 ຕື້ 375 ລ້ານກີບ ໂດຍແຊ້ມປະເພດ ຮາຟມາຣາທອນ ໄລຍະທາງ 21.1 ກິໂລແມັດ ຍິງ-ຊາຍ ແບບເປີດກວ້າງບໍ່ຈຳກັດສັນຊາດ, ອາຍຸ 16 ປີຂຶ້ນໄປ ແຊ້ມຈະໄດ້ຮັບຫລຽນຄຳ, ຂັນລາງວັນ ແລະ ເງິນລາງວັນເຖິງ 200 ລ້ານກີບ, ຮອງແຊ້ມ ຈະໄດ້ຮັບຫລຽນເງິນ, ຂັນລາງວັນ ແລະ ເງິນລາງວັນ 150 ລ້ານກີບ ແລະ ທີສາມ ໄດ້ຮັບຫລຽນທອງ, ຂັນລາງວັນ ແລະ ເງິນລາງວັນ 100 ລ້ານກີບ, ທີ 4: ຈະໄດ້ຮັບເງິນລາງວັນ 50 ລ້ານກີບ, ທີ 5: 25 ລ້ານກີບ, ທີ 6: 20 ລ້ານກີບ, ທີ 7: 15 ລ້ານກີບ, ທີ 8: 10 ລ້ານກີບ, ທີ 9: 7 ລ້ານ 5 ແສນກີບ ແລະ ທີ 10: 5 ລ້ານກີບ, ໂດຍທີ 4-10 ແມ່ນໄດ້ຮັບຫລຽນທີ່ລະນຶກທັງໝົດ.

ຂະນະທີ່ ປະເພດມິນິມາຣາທອນ ໄລຍະທາງ 10.5 ກິໂລແມັດ ຍິງ-ຊາຍ ເຊິ່ງຍົກເວັ້ນນັກກິລາລະດັບຊາດຂອງແຕ່ລະປະເທດ ອາຍຸ 16 ປີຂຶ້ນໄປ ທີ 1 ຈະໄດ້ຮັບຫລຽນຄຳ, ຂັນລາງວັນ ແລະ ເງິນລາງວັນ 20 ລ້ານກີບ, ທີ 2 ຈະໄດ້ຮັບຫລຽນເງິນ, ຂັນລາງວັນ ແລະ ເງິນລາງວັນ 17 ລ້ານ 5 ແສນກີບ, ທີ 3 ໄດ້ຮັບຫລຽນທອງ, ຂັນລາງວັນ ແລະ ເງິນລາງວັນ 15 ລ້ານກີບ, ທີ 4 ໄດ້ຮັບຫລຽນທີ່ລະນຶກ ແລະ ເງິນລາງວັນ 12 ລ້ານ 5 ແສນກີບ ແລະ ທີ 5 ໄດ້ຮັບຫລຽນທີ່ລະນຶກ ແລະ ເງິນລາງວັນ 10 ລ້ານກີບ.

ສ່ວນປະເພດມິນິມາຣາທອນ ໄລຍະທາງ 10.5 ກິໂລແມັດ ຍິງ-ຊາຍ ສົ່ງເສີມເຍົາວະຊົນ-ໄວໜຸ່ມ ອາຍຸ 16 ປີລົງມາ ເຊິ່ງຍົກເວັ້ນນັກກິລາລະດັບຊາດຂອງແຕ່ລະປະເທດ, ຊະນະເລີດ ຈະໄດ້ຮັບຫລຽນຄຳ, ຂັນລາງວັນ ແລະ ເງິນລາງວັນ 12 ລ້ານ 5 ແສນກີບ, ທີ 2 ຈະໄດ້ຮັບຫລຽນເງິນ, ຂັນລາງວັນ ແລະ ເງິນລາງວັນ 10 ລ້ານກີບ, ທີ 3 ໄດ້ຮັບຫລຽນທອງ, ຂັນລາງວັນ ແລະ ເງິນລາງວັນ 7 ລ້ານ 5 ແສນກີບ. ປະເພດມິນິມາຣາທອນ ບໍ່ມີຄ່າລົງທະບຽນ ຜູ້ຈ່າຍ 150,000 ກີບ ຈະໄດ້ຮັບເສື້ອ ແລະ ຫລຽນທີ່ລະນຶກ.

Leave a Reply

Your email address will not be published. Required fields are marked *