ສປປ ລາວ ແລະ ຮົງກາຣີ ຈັດກິດຈະກຳແຂ່ງຂັນກິລາມິດຕະພາບ ເພື່ອສະເຫລີມສະຫລອງວັນສ້າງຕັ້ງສາຍພົວພັນການທູດ ຄົບຮອບ 60 ປີ

ກິດຈະກຳຄັ້ງນີ້ ຈັດຂຶ້ນວັນທີ 13 ກັນຍານີ້ ທີ່ເດີ່ນກິລາໃນຮົ່ມບຶ່ງຂະຫຍອງ ນະຄອນຫລວງວຽງຈັນ ໂດຍມີ ທ່ານ ບຸນເຫລືອ ພັນດານຸວົງ ແລະ ທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ ຕາງໜ້າລັດຖະບານລາວ, ທ່ານ ຊານດໍ ຊີໂພສ ເອກອັກຄະລັດຖະທູດວິສາມັນ ຜູ້ມີອຳນາດເຕັມແຫ່ງ ຮົງກາຣີ ປະຈຳລາວ, ພ້ອມດ້ວຍແຂກຖືກເຊີນເຂົ້າຮ່ວມ.

ໃນໂອກາດສະເຫລີມສະຫລອງວັນສ້າງຕັ້ງສາຍພົວພັນການທູດ ຄົບຮອບ 60 ປີ ສປປ ລາວ ແລະ ຮົງກາຣີ ໄດ້ຈັດຫລາຍກິດຈະກຳຮ່ວມກັນ ເພື່ອສ້າງຂະບວນການໃຫ້ມີຄວາມໝາຍ ຄວາມສຳຄັນຢ່າງເລິກເຊິ່ງ ແລະ ມີບັນຍາກາດທີ່ຟົດຟື້ນ ເປັນຕົ້ນການປູກຕົ້ນມິດຕະພາບ ທີ່ສວນສາທາລະນະເຈົ້າອະນຸວົງ, ການແຂ່ງຂັນກິລາດອກປີກໄກ່ ມິດຕະພາບ ເພື່ອຮັດແໜ້ນຄວາມສາມັກຄີ ແລະ ເສີມສ້າງສາຍພົວພັນມິດຕະພາບ ລະຫວ່າງ ລາວ ແລະ ຮົງກາຣີ ເຊິ່ງກິດຈະກຳແຂ່ງຂັນກິລາຄັ້ງນີ້ ເຕັມໄປດ້ວຍນໍ້າໃຈ ໄມຕີຈິດ ມິດຕະພາບ ແລະ ຄວາມເບີກບານມ່ວນຊື່ນ ສ່ອງແສງໃຫ້ເຫັນເຖິງຄວາມຮັກແພງ ສາມັກຄີ ແລະ ການຮ່ວມມືອັນດີງາມຂອງສອງຊາດ ລາວ-ຮົງກາຣີ ທີ່ມີມາຢ່າງຍາວນານ.

Leave a Reply

Your email address will not be published.