ທຸງຊາດລາວ ແລະ ທຸງຊາດໃນອາຊຽນ ຖືກເຊີນຂຶ້ນສູ່ຍອດເສົາ ໃນງານກິລາ ອາຊຽນພາຣາເກມ ຄັ້ງທີ 12 ທີ່ກຳປູເຈຍ

ວັນທີ 2 ມິຖຸນາ 2023 ນີ້ ທຸງຊາດລາວ ແລະ ທຸງຊາດໃນອາຊຽນ ທີ່ເຂົ້າຮ່ວມງານກິລາຄົນພິການອາຊຽນ ຫລື ອາຊຽນພາຣາເກມ ຄັ້ງທີ 12 ທີ່ກຳປູເຈຍ ເປັນເຈົ້າພາບ ໄດ້ຖືກເຊີນຂຶ້ນສູ່ຍອດເສົາຢ່າງເປັນທາງການ ທີ່ສະໜາມກິລາແຫ່ງຊາດ ມໍໂຣດັອກ ເຕໂຊ ນະຄອນຫຼວງພະນົມເປັນ ປະເທດກຳປູເຈຍ ໂດຍທຸງຊາດລາວ ຖືກເຊີນຂຶ້ນເປັນອັນດັບທີ 4 ຮອງຈາກ ອິນໂດເນເຊຍ, ກຳປູເຈຍ ແລະ ບຣູໄນ.

ໃຫ້ກຽດເຂົ້າຮ່ວມມີ ທ່ານ ຫັນມານີ ສະມາຊິກສະພາແຫ່ງຊາດກຳປູເຈຍ, ຕາງໜ້າຝ່າຍລາວ ນຳໂດຍ ທ່ານ ວິລະວັນ ບຸນສຸກໄທ ຮອງປະທານ ແລະ ເລຂາທິການ ຄະນະກຳມະການພາຣາແລມປິກແຫ່ງຊາດລາວ ທັງເປັນຫົວໜ້າກົມກິລາມວນຊົນ, ພະລະ ແລະ ສິລະປະສຶກສາ, ມີຄະນະນຳທີ່ກ່ຽວຂ້ອງຂອງກຳປູເຈຍ, ບັນດາຄະນະນຳແຕ່ລະຊາດ, ຄູຝຶກ, ນັກກິລາ ແລະ ສື່ມວນຊົນ.

ການແຂ່ງຂັນງານກິລາ ອາຊຽນພາຣາເກມ ຄັ້ງນີ້ ມີຄະນະນຳ, ຄູຝຶກ ແລະ ນັກກິລາເຂົ້າຮ່ວມທັງໝົດ 2.692 ຄົນ ຈາກ 11 ຊາດໃນອາຊຽນ ສະເພາະ ສປປ ລາວ ສົ່ງເຂົ້າຮ່ວມ 89 ຄົນ, ຍິງ 36 ຄົນ ຈາກທັງໝົດ 7 ປະເພດກິລາຈາກທັງໝົດ 12 ປະເພດກິລາຄື: ບານເຕະຄົນພິການຕາ (5 ຄົນ), ໂກນບານ, ບັອກເຊຍ, ບານບ້ວງລໍ້ເລື່ອນທີມຍິງ, ລອຍນໍ້າ, ຍົກນໍ້າໜັກ ແລະ ແລ່ນ-ລານ. ງານຄັ້ງນີ້ ຈະແຂ່ງຂັນໃນລະຫວ່າງວັນທີ 3-9 ມິຖຸນານີ້.

ຂ່າວໂດຍ ສົງການ ພັນແພງດີ

Leave a Reply

Your email address will not be published. Required fields are marked *