W.I.G Naga ຄວ້າແຊັມ U10 ແລະ U12 ບານເຕະເຍົາວະຊົນ Mazda Challenge Cup 2023

ການແຂ່ງຂັນຄັງນີ້ ຈັດຂຶ້ນໃນວັນທີ 27-28 ພຶດສະພາ 2023 ຜ່ານມາ, ທີ່ສະໜາມກິລາແຫ່ງຊາດ ຫຼັກ 16 ສະໜາມນອກ, ເຂົ້າຮ່ວມພິທີເປີດມີ ທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີ ກະຊວງສຶກສາທິການ ແລະ ກິລາ, ທ່ານ ທິບພະເນດ ແກ້ວມະນິວົງ ປະທານບໍລິສັດ ແກ້ວໂອໂຕ ກຣຸບ ຈຳກັດ ຕົວແທນຈຳໜ່າຍລົດ Mazda ພຽງຜູ້ດຽວໃນ ສປປ ລາວ ທັງເປັນປະທານຈັດງານ, ມີຄະນະນຳ, ຄູຝຶກ, ນັກກິລາ ແລະ ກອງເຊຍເຂົ້າຮ່ວມ.

ການແຂ່ງຂັນມີທັງໝົດ 3 ຮຸ່ນອາຍຸຄື: U10 ປີ, U12 ປີ ແລະ U14 ປີ ລວມ 36 ທີມເຂົ້າຮ່ວມ. ຜ່ານການແຂ່ງຂັນ U10 ປີ ແຊ້ມແມ່ນ W.I.G Naga ຈາກເມືອງຫາດຊາຍຟອງ ນະຄອນຫລວງວຽງຈັນ ໄດ້ຮັບຂັນແຊ້ມ, ຫຼຽນລາງວັນ ແລະ ເງິນລາງວັນ 5 ລ້ານກີບ, ຮອງຊະນະເລີດ ພີເຄພີ ແຂວງຫຼວງພະບາງ ໄດ້ຮັບເງິນລາງວັນ 3 ລ້ານກີບ ແລະ ອັນດັບທີ 3 ມັດສະດາ ລາວ ຈີບີ ທີມ ເອ ໄດ້ຮັບເງິນລາງວັນ 1 ລ້ານກີບ.

ສ່ວນ U12 ແຊ້ມກໍເປັນຂອງ W.I.G Naga ໄດ້ຮັບຂັນແຊ້ມ, ຫຼຽນລາງວັນ ແລະ ເງິນລາງວັນ 5 ລ້ານກີບ, ຮອງຊະນະເລີດ ພີເຄພີ ຈາກແຂວງຫຼວງພະບາງ ໄດ້ຮັບເງິນລາງວັນ 3 ລ້ານກີບ ແລະ ອັນດັບທີ 3 ໂກນເດິນບອຍ ທີມບີ ຈາກແຂວງເລີຍ ປະເທດໄທ ໄດ້ຮັບເງິນລາງວັນ 1 ລ້ານກີບ.

ຂະນະທີ່ U14 ແຊ້ມເປັນຂອງ ຄຳໃສ ເອັຟຊີ ໄດ້ຮັບຂັນແຊ້ມ, ຫຼຽນລາງວັນ ແລະ ເງິນລາງວັນ 5 ລ້ານກີບ, ຮອງຊະນະເລີດ ວອນທະບິງ ອະຄາເດມີ້ ຈາກແຂວງຫຼວງພະບາງ ໄດ້ຮັບເງິນລາງວັນ 3 ລ້ານກີບ ແລະ ອັນດັບທີ 3 ມັດສະດາ ລາວ ຈີບີ ເອັຟຊີ ໄດ້ຮັບເງິນລາງວັນ 1 ລ້ານກີບ.

ນອກຈາກນີ້ກໍ່ມີລາງວັນນັກກິລາດີເດັ່ນ U10 ໂດຍຜູ້ຮັກປະຕູດີເດັ່ນ ເປັນຂອງ ພີເຄພີ ຫຼວງພະບາງ, ນັກກິລາດີເດັ່ນ ເປັນຂອງ W.I.G Naga ແລະ ຄູຝຶກດີເດັ່ນກໍເປັນຂອງ W.I.G Naga. ສ່ວນ U12 ຜູ້ຮັກປະຕູດີເດັ່ນ ແລະ ນັກກິລາດີເດັ່ນ ເປັນຂອງ ເປັນຂອງ W.I.G Naga, ຄູຝຶກດີເດັ່ນ ເປັນຂອງ ພີເຄພີ ຫຼວງພະບາງ, ຂະນະທີ່ U14 ຜູ້ຮັກປະຕູດີເດັ່ນ ເປັນຂອງ ມັດສະດາ ລາວ ຈີບີ ເອັຟຊີ, ນັກກິລາດີເດັ່ນ ເປັນຂອງ ຄຳໃສ ເອັຟຊີ ແລະ ຄູຝຶກດີເດັ່ນເປັນຂອງ ວອນທະບິງ ອະຄາເດມີ້.

ການແຂ່ງຂັນເຕະບານ Mazda Challenge Cup ເປັນລາຍການມີຜົນຕອບຮັບທີ່ດີຈາກຜູ້ເຂົ້າຮ່ວມ ແລະ ແຟນບານ ໂດຍມີນັກກິລາເຂົ້າຮ່ວມ ຈຳນວນ 1 ພັນກວ່າຄົນ ຈາກບັນດາສະໂມສອນໃນນະຄອນຫຼວງວຽງຈັນ, ແຂວງບໍລິຄຳໄຊ, ແຂວງຫຼວງພະບາງ, ແຂວງຊຽງຂວາງ, ແຂວງອຸດົມໄຊ ແລະ ຈາກແຂວງເລີຍ ປະເທດໄທ, ຈັດຂຶ້ນເພື່ອເປັນການສົ່ງເສີມຫຼານນ້ອຍເຍົາວະຊົນລາວທີ່ມັກຮັກໃນກິລາເຕະບານ ໄດ້ມີການເຄື່ອນໄຫວຝຶກແອບແຂ່ງຂັນ ແລະ ພັດທະນາຢ່າງຕໍ່ເນື່ອງ ເພື່ອກ້າວສູ່ການເປັນນັກກິລາອາຊີບ ແລະ ຕິດທີມຊາດໃນອະນາຄົດ.

Photo: MAZDA LAOS GB FC

Leave a Reply

Your email address will not be published. Required fields are marked *