ສະຫລຸບ ພຣີເມ່ຍລີກ ອັງກິດ ຫລັງຈົບນັດສຸດທ້າຍ ລະດູການ 2022-23

ນັດສຸດທ້າຍຂອງ ພຣີເມ່ຍລີກ ອັງກິດ ລະດູການນີ້ ໄປມ່ວນມັນທີ່ການລຸ້ນອັນດັບໄປ ຢູຟ້າ ຢູໂຣປ້າ ຄອນເຟີເຣັນລີກ ແລະ ໜີຕົກຊັ້ນ, ສະເພາະການລຸ້ນອັນດັບ 7 ໄປບານເອີຣົບ ຄອນເຟີເຣັນລີກ ແອັສຕັນ ວິນລ້າ ເປີດບ້ານຊະນະ ໄບຣຕັ້ນ 2-1, ສະເປີ ບຸກຊະນະ ລີດ ຢູໄນເຕັດ ທີມໜີຕົກຊັ້ນ 4-1 ແລະ ເບັນຟອດ ຊະນະ ແມນຊິຕີ້ ທີມແຊ້ມ 1-0. ວິນລ້າ ໄດ້ອັນດັບທີ 7 ໄດ້ໄປບານເອີຣົບໃນຮອບ 13 ປີ, ມີຄະແນນຫລາຍກວ່າ ສະເປີ 1 ຄະແນນ ແລະ ເບັນຟອດ 2 ຄະແນນ.

ຂະນະທີ່ ການໜີຕົກຊັ້ນ: ເອັຟເວີຕັນ ເປີດບ້ານຊະນະ ບຣອນມັດ 1-0, ເລັສເຕີ ເປີດບ້ານຊະນະ ເວັສແຮມ 2-1 ແລະ ລີດ ຢູໄນເຕັດ ເສຍຄາບ້ານໃຫ້ ສະເປີ 1-4. ເອັຟເວີຕັນ ລອດຕົກຊັ້ນ ຫ່າງຈາກພື້ນທີ່ຕົກຊັ້ນ 2 ຄະແນນ, ສ່ວນ ເລັສເຕີ ແລະ ລີດ ຕົກຊັ້ນຕາມຫລັງ ເຊົາແທ່ມຕັນ.

1 ໃນ 4 ໄດ້ໄປຫລິ້ນ ຢູຟ້າ ແຊ້ມປ້ຽນລີກ ລະດູການໜ້າແມ່ນ: ແມນຊິຕີ້ ທີມແຊ້ມ, ອາຣເຊນໍລ ອັນດັບ 2, ແມນຢູ ອັນດັບ 3 ແລະ ນິວຄາສເຊິນ ອັນດັບ 4, ທີ 5 ລີເວີພູລ, ທີ 6 ໄບຣຕັ້ນ ໄດ້ໄປຫລິ້ນ ຢູໂຣປ້າລີກ.

ດາວຍິງສູງສຸດເປັນຂອງ ເອີລິ້ງ ຮາແລນ ຍິງ 36 ປະຕູ, ຜູ້ສົ່ງບານໃຫ້ເພື່ອນຍິງປະຕູຫລາຍສຸດ ຫລື ແອັສຊິດແມ່ນ ເຄວິນ ເດີບອຍ 16 ຄັ້ງ ແລະ ຜູ້ຮັກສາປະຕູດີເດັ່ນ ເສຍປະຕູໜ້ອຍສຸດໄດ້ແກ່ ດາບິດ ເດເກອາ ບໍ່ເສຍປະຕູ 17 ນັດ.

ລະດູການນີ້ 380 ນັດ ມີປະຕູເກີດຂຶ້ນທັງໝົດ 1,084 ໜ່ວຍ ຫລາຍສຸດໃນປະຫວັດສາດ ພຣີເມ່ຍລີກ, ສະເລ່ຍນັດໜຶ່ງເກືອບ 3 ໜ່ວຍ, ມີຜູ້ຊົມໃນສະໜາມ 15,138,000 ກວ່າຄົນ, ສະເລ່ຍນັດໜຶ່ງ 4 ໝື່ນກວ່າຄົນ.

Leave a Reply

Your email address will not be published. Required fields are marked *