ເບັຊແຊັກຄີ້ ຄວ້າແຊ້ມ MotoGP ສະໜາມທີ 5 ປີ 2023 ທີ່ຝຣັ່ງ ບານາຢ້າ ແລະ ມາເກັຊ ແຂ່ງບໍ່ຈົບ!

ການແຂ່ງຂັນລົດຈັກທາງລຽບ ຊິງແຊ້ມໂລກ ສະໜາມທີ 5 ຂອງປີ 2023 ລາຍການ ເຟັ້ນ ກຣັງປຣີ ທີ່ສະໜາມ ເຊີກິດ ບູກັດຕິ, ໃນເມືອງເລີມ໋ອງ ປະເທດຝຣັ່ງ ແຂ່ງຂັນໃນທ້າຍອາທິດຜ່ານມາ ຄວາມຍາວຕໍ່ຮອບ 4.185 ແມັດ ແຂ່ງທັງໝົດ 27 ຮອບ.

ປະກົດວ່າ: ຟຣານເຊັສໂກ້ ແບັກໄນອາ (ບານາຢ້າ) ແຊ້ມເກົ່າ ຈາກຄ້າຍດູຄາຕິ ອອກໂຕເປັນຄົນທຳອິດ ແຕ່ເກີດອຸບັດຕິເຫດໃນຮອບທີ 4 ເຮັດໃຫ້ແຂ່ງບໍ່ຈົບ, ເໝືອນກັບ ມາກ ມາເກັຊ ແຊ້ມໂລກ 6 ສະໄໝ ຊາວແອັສປາຍ ຈາກທີມຮອນດ້າ ເກີດອຸບັດຕິເຫດໃນຮອບທີ 25, ສ່ວນແຊ້ມສະໜາມນີ້ ເປັນຂອງ ມາຣໂກ້ ເບັຊແຊັກຄີ້ ຊາວອີຕາລີ ຈາກທີມດູຄາຕິ ອອກໂຕເປັນຄົນທີ 7 ແຕ່ພາລົດຄູ່ໃຈແຊງຄູ່ແຂ່ງເຂົ້າເສັ້ນໄຊເປັນຄົນທຳອິດ ດ້ວຍເວລາ 41 ນາທີ 37.970 ວິນາທີ ເອົາຊະນະ ຈໍເກ້ ມາຣຕິນ ນັກຂັບຊາວແອັສປາຍ ຈາກຄ້າຍດຽວກັນ 4 ກວ່າວິນາທີ ໄດ້ແຊ້ມເປັນສະໜາມທີສອງໃນປີນີ້ ຕໍ່ຈາກສະໜາມທີສອງ ທີ່ອາກຊັງຕິນ ເປັນການສະຫລອງການສະໜາມແຂ່ງຂັນທີ 1000 ຂອງໂມໂຕຈີພີ.

ອັນດັບທີສາມ ສະໜາມນີ້ ເປັນຂອງ ຢູຮັນ ຊາໂກ້ ນັກຂັບຊາວຝຣັ່ງ ອີກໜຶ່ງນັກຂັບຈາກຄ້າຍດູຄາຕິ ຕາມຫລັງເກືອບ 5 ວິນາທີ, ສ່ວນ ຟາບີໂອ ກວາຕາຣາໂຣ້ ແຊ້ມໂລກ ປີ 2021 ຊາວຝຣັ່ງ ຈາກຄ້າຍຢາມາຮ່າ ຈົບອັນດັບທີ 7 ຕາມຫລັງເກືອບ 15 ກວ່າວິນາທີ.

ສະຫລຸບຄະແນນນັກຂັບຜ່ານໄປ 5 ສະໜາມ ຜູ້ນຳຍັງຄົງເປັນ ຟຣານເຊັສໂກ້ ແບັກໄນອາ (ບານາຢ້າ) ແຊ້ມເກົ່າ ມີ 94 ຄະແນນ, ທີສອງ ມາຣໂກ້ ເບັຊແຊັກຄີ້ ມີ 93 ຄະແນນ, ທີສາມ ແບຣດ ໄບເດີ ມີ 81 ຄະແນນ. ທີມຜູ້ສ້າງ ຜູ້ນຳແມ່ນ ດູຄາຕິ ມີ 174 ຄະແນນ, ທີສອງ ເຄທີເອັມ ມີ 103 ຄະແນນ, ທີສາມ ອາພຣີເລຍ ມີ 80 ຄະແນນ.

ສະໜາມຕໍ່ໄປ ສະໜາມທີ 6 ລາຍການ ອີຕາລ້ຽນ ກຣັງປຣີ ທີ່ສະໜາມ ມູເຈວໂລ້, ປະເທດອີຕາລີ ຈະແຂ່ງຂັນວັນທີ 9-11 ມິຖຸນານີ້.

Photo: MotoGP

Leave a Reply

Your email address will not be published. Required fields are marked *