ເດີ ແຊ້ມປ້ຽນຊິບ ລີກອັນດັບສອງຂອງອັງກິດ ສຳເລັດລະດູການປົກກະຕິ 2022-23 ຊັນເດີແລນ ລຸ້ນເລື່ອນຊັ້ນສູ່ ພຣີເມ່ຍລີກ ໃນຮອບ 6 ປີ

ພາຍຫລັງຈົບການແຂ່ງຂັນນັດສຸດທ້າຍ ຂອງລະດູການປົກກະຕິ ໃນຕົ້ນອາທິດນີ້, ປະກົດວ່າ: ຈຸດເດັ່ນໄປຢູ່ທີ່ການລຸ້ນອັນດັບໄປເພອັອຟເພື່ອເລື່ອນຊັ້ນ ແລະ ການໜີຕົກຊັ້ນ ເພາະແຊ້ມກັບຮອງແຊ້ມຮູ້ກັນກ່ອນໜ້ານີ້ແລ້ວ, ແຊ້ມແມ່ນ ເບີນລີ້ ແລະ ຮອງແຊ້ມແມ່ນ ເຊັຟຟິວ ຢູໄນເຕັດ ຄວ້າສິດເລື່ອນຊັ້ນສູ່ພຣີເມ່ຍລີກລະດູການໜ້າ.

ສ່ວນການລຸ້ນອັນດັບໄປເພອັອຟເພື່ອເລື່ອນຊັ້ນລຸ້ນກັນສຸດມັນໃນນັດສຸດທ້າຍເຖິງ 5 ຄື: ໂຄເວັນທີ້ ຊິຕີ້, ຊັນເດີແລນ, ແບັກເບີນ ໂຣເວີ, ມິວວໍລ ແລະ ເວັສບຣອມວິກ ອາວບ້ຽນ, ຂະນະທີ່ ລູຕັນ ທາວ ແລະ ມິດເດິນສະໂບ ຕິດອັນດັບໄປເພອັອຟແນ່ນອນແລ້ວ ແລະ ຜົນນັດສຸດທ້າຍປະກົດວ່າ: ທັບແມວດຳ ຊັນເດີແລນ ບຸກຊະນະ ເປັສຕັນ ນ໊ອດເອນ 3-0, ໂຄເວັນທີ້ ບຸກສະເໝີ ມິດເດິນສະໂບ 1-1, ແບັກເບີນ ໂຣເວີ ບຸກຊະນະ ມິວວໍລ 4-3 ແລະ ເວັສບຣອມວິກ ບຸກເສຍໃຫ້ ສະວອນຊີ ຊິຕີ້ 2-3.

ຈາກຜົນດັ່ງກ່າວ ເຮັດໃຫ້ ຊັນເດີແລນ ຈົບອັນດັບ 6 ແລະ ໂຄເວັນທີ້ ຈົບອັນດັບ 5 ໄດ້ສິດໄປເພອັອຟເພື່ອລຸ້ນເລື່ອນຊັ້ນສູ່ ພຣີເມ່ຍລີກ, ຊັນເດີແລນ ລຸ້ນເລື່ອນຊັ້ນສູ່ ພຣີເມ່ຍລີກ ອີກຄັ້ງໃນຮອບ 6 ປີ ເຊັ່ນດຽວກັບ ມິດເດິນສະໂບ, ລະດູການຜ່ານມາ ຊັນເດີແລນ ເລື່ອນຊັ້ນຈາກລີກວັນ ມາສູ່ແຊ້ມປ້ຽນຊິບ, ຂະນະທີ່ ໂຄເວັນທີ້ ກໍລຸ້ນເລື່ອນຊັ້ນກັບສູ່ລີກສູງສຸດໃນຮອບ 22 ປີ, ສ່ວນ ລູຕັນ ທາວ ລຸ້ນເລື່ອນຊັ້ນສູ່ ພຣີເມ່ຍລີກ ຄັ້ງທຳອິດ!

ການເພອັອຟຊິງເລື່ອນຊັ້ນສູ່ ພຣີເມ່ຍລີກ ມິດເດິນສະໂບ ພົບ ໂຄເວັນທີ້ ແລະ ຊັນເດີແລນ ພົບ ລູຕັນ ທາວ ຈະແຂ່ງຂັນສອງນັດໄປ-ກັບ ນັດທີໜຶ່ງ ແຂ່ງຂັນວັນທີ 13 & 14 ພຶດສະພານີ້, ນັດທີສອງ ວັນທີ 16 & 17 ພຶດສະພາ, ຄັດເອົາຜູ້ຊະນະໄປຊິງຢູ່ສະໜາມເວັມບລີ້ ວັນທີ 27 ພຶດສະພານີ້.

Photo: Sunderland AFC

Leave a Reply

Your email address will not be published. Required fields are marked *