ໄມເຄິນ ໄວສ໌ ຕັ້ງເປົ້າພາທີມຊາດລາວ U20 ປີ ຊະນະ ກວມ, ເຢເມັນ ແລະ ປາເລັສຕິນ ລຸ້ນເຂົ້າຮອບສຸດທ້າຍ ຊິງແຊ້ມອາຊີ ທີ່ອຸສເບກິສຖານ

ໄມເຄິນ ໄວສ໌ ຄູຝຶກທີມຊາດລາວຊາວເຢຍລະມັນ ຕັ້ງເປົ້າພາທີມຊາດລາວ ຮຸ່ນອາຍຸບໍ່ເກີນ 20 ປີ (U20) ຊະນະ ກວມ, ເຢເມັນ ແລະ ປາເລັສຕິນ ເພື່ອລຸ້ນເຂົ້າຮອບສຸດທ້າຍ ການແຂ່ງຂັນເຕະບານຊາຍ U20 ຊິງແຊ້ມອາຊີ ຮອບຄັດເລືອກ ກຸ່ມ C ທີ່ ສປປ ລາວ ເປັນເຈົ້າພາບ ໃນລະຫວ່າງວັນທີ 10-18 ກັນຍານີ້.

ທ່ານ ໄມເຄິນ ໄວສ໌ ກ່າວວ່າ: ເຖິງວ່າເປັນເປົ້າໝາຍທີ່ຍາກ ແລະ ທ້າທາຍ ແຕ່ຈະພະຍາຍາມພາລູກທີມສູ້ສຸດຂີດ ເພື່ອຄວ້າໄຊຊະນະມາໃຫ້ໄດ້, ສ່ວນການພົບກັບ ຍີ່ປຸ່ນ ທີມເຕັງແຊ້ມກຸ່ມນີ້ ການຍາດແຍ່ງຄະແນນຈາກທັບຊາມູໄຣ ຖືວ່າເປັນເລື່ອງທີ່ຍາກຢ່າງຍິ່ງ ແຕ່ຈະພານັກກິລາສູ້ສຸດຄວາມສາມາດ ເພື່ອຊິງໂອກາດເຂົ້າຮອບສຸດທ້າຍຕໍ່ໄປ, ໄວສ໌ ກ່າວຕື່ມວ່າ: ຖ້າມີ 9 ຄະແນນຈາກ 4 ນັດ ຍັງມີລຸ້ນເປັນອັນດັບທີສອງດີສຸດ 5 ຫລື 6 ເພື່ອເຂົ້າຮອບສຸດທ້າຍທີ່ປະເທດອຸສເບກິສຖານ ໃນປີ 2023.

ນັກກິລາບານເຕະ U20 ທີມຊາດລາວຊຸດນີ້ ສ່ວນຫລາຍເປັນຊຸດ U19 ທີ່ສ້າງປະຫວັດສາດໄດ້ຮອງແຊ້ມອາຊຽນ 2022 ໃນເດືອນກໍລະກົດຜ່ານມາ, ເກັບຕົວຝຶກຊ້ອມໃນທ້າຍເດືອນສິງຫາ ແລະ ໃນວັນທີ 9 ກັນຍານີ້ ຈະທຳການຄັດຕົວນັກກິລາຈາກ 29 ຄົນ ໃຫ້ເຫລືອ 23 ຄົນຕາມໂຄຕ້າ.

ສຳລັບຕາຕະລາງການແຂ່ງຂັນຂອງ ທີມຊາດລາວ U20 ປີ ໃນການຄັດເລືອກໄປຊິງແຊ້ມອາຊີ ຄັ້ງນີ້ ນັດທີ 1 ພົບກັບ ກວມ ໃນວັນທີ 10 ກັນຍາ, ນັດທີ 2 ພົບ ຍີ່ປຸ່ນ ວັນທີ 12 ກັນຍາ, ນັດທີ 3 ພົບກັບ ເຢເມນ ວັນທີ 14 ກັນຍາ ແລະ ນັດທີ 4 ນັດສຸດທ້າຍ ທີມຊາດລາວ ພົບ ປາເລັສຕິນ ວັນທີ 18 ກັນຍາ ທຸກນັດຂອງທີມຊາດລາວ ແຂ່ງເວລາ 19:00 ໂມງ ເຊິ່ງທຸກນັດແຂ່ງຂັນທີ່ສະຫນາມກິລາແຫ່ງຊາດຫຼັກ 16, ຖ່າຍທອດສົດ ທາງໂທລະພາບແຫ່ງຊາດລາວ ຊ່ອງ 3 HD. ບັດເຂົ້າຊົມລາຄາ 10.000 ກີບ ສາມາດຊື້ໄດ້ທີ່ ສະຫະພັນບານເຕະແຫ່ງຊາດລາວ ແລະ ສະຫນາມກິລາແຫ່ງຊາດຫຼັກ 16 ໃນມື້ທີ່ມີການແຂ່ງຂັນ, ໂດຍລາຍໄດ້ຈາກການຂາຍບັດເຂົ້າຊົມທັງໝົດ ໂດຍບໍ່ຫັກຄ່າໃຊ້ຈ່າຍໃດໆ ສະຫະພັນບານເຕະແຫ່ງຊາດລາວ ຈະນຳໄປປະກອບສ່ວນຊ່ວຍເຫລືອແຂວງອຸດົມໄຊທີ່ໄດ້ຮັບຜົນກະທົບຈາກໄພນໍ້າຖ້ວມໃນທ້າຍເດືອນສິງຫາຜ່ານມາ ເພື່ອຊ່ວຍສ້ອມແປງລະບົບນໍ້າລີນທີ່ຖືກຜົນກະທົບຈາກໄພນໍ້າຖ້ວມດັ່ງກ່າວ.

ສຳລັບການແຂ່ງຂັນເຕະບານຊາຍ ຮຸ່ນອາຍຸບໍ່ເກີນ 20 ປີ ຊິງແຊ້ມອາຊີ 2023 ຮອບຄັດເລືອກ ມີ 43 ທີມ ເຂົ້າຮ່ວມ ໂດຍໄດ້ແບ່ງອອກເປັນ 10 ກຸ່ມ, ຄັດເອົາທີ 1 ຂອງແຕ່ລະກຸ່ມ ບວກກັບທີ 2 ຂອງກຸ່ມ ທີ່ມີຄະແນນດີທີ່ສຸດຈຳນວນ 5-6 ທີມ ຜ່ານເຂົ້າຮອບສຸດທ້າຍທີ່ປະເທດອຸສເບກິສຖານ ໃນເດືອນມີນາ ປີ 2023.

ສຳລັບ ສປປ ລາວ ເປັນເຈົ້າພາບຮອບຄັດເລືອກ ກຸ່ມ C ປະກອບມີ: ທີມຊາດລາວ, ຍີ່ປຸ່ນ, ເຢເມນ, ປາເລັສຕິນ ແລະ ກວມ, ຈະແຂ່ງຂັນລະຫວ່າງວັນທີ 10-18 ກັນຍາ 2022 ທີ່ສະໜາມກິລາແຫ່ງຊາດ ຫລັກ 16.

Photo: LFF

Leave a Reply

Your email address will not be published.