ສຕລ ຈັດກອງປະຊຸມພັດທະນາບານເຕະທົ່ວປະເທດ ປະຈຳປີ 2022 LFF LAO FORD CUP ອາດມີ 20 ກວ່າທີມເຂົ້າຮ່ວມ

ໃນທ້າຍອາທິດຜ່ານມາ, ສະຫະພັນບານເຕະແຫ່ງຊາດລາວ (ສຕລ) ໄດ້ຈັດກອງປະຊຸມພັດທະນາກີລາບານເຕະທົ່ວປະເທດ ປະຈໍາປີ 2022 ທີ່ຫ້ອງປະຊຸມຂອງສະຫະພັນບານເຕະແຫ່ງຊາດ ພາຍໃຕ້ການເປັນປະທານຂອງທ່ານ ວີເພັດ ສີຫາຈັກຣ໌ ປະທານສະຫະພັນບານເຕະແຫ່ງຊາດ ໂດຍມີຜູ້ຕາງໜ້າຈາກສະຫະພັນບານເຕະແຕ່ລະແຂວງ ພ້ອມດ້ວຍສື່ມວນຊົນເຂົ້າຮ່ວມ.

ກອງປະຊຸມຄັ້ງນີ້ ຈັດຂຶ້ນເພື່ອໃຫ້ແຕ່ລະແຂວງໄດ້ຮ່ວມກັນປຶກສາຫາລື ເພື່ອພັດທະນາບານເຕະລາວ ໂດຍສະເພາະການສືບຕໍ່ຈັດຕັ້ງປະຕິບັດແຜນການຍຸດທະສາດຂອງ ສຕລ ທີ່ນຳກົດໄວ້ໃຫ້ປະກົດຜົນເປັນຈິງ, ໃນນັ້ນແມ່ນການປະສານສົມທົບກັບສະຫະພັນບານເຕະແຕ່ລະແຂວງ, ເຊິ່ງໃນປີ 2022 ແມ່ນໄດ້ມີການຈັດການແຂ່ງຂັນບານເຕະລາວລີກ 2 ໃນແຕ່ລະແຂວງເປັນຄັ້ງທໍາອິດ ເຊິ່ງແຕ່ລະແຂວງກໍໄດ້ມີການແຂ່ງຂັນສໍາເລັດໄປແລ້ວ ແລະ ບາງແຂວງກໍຍັງກໍາລັງດໍາເນີນການຢູ່ ລວມເຖິງລາຍງານແຜນການວຽກງານຕ່າງໆໃນປີຕໍ່ໜ້າ.

ໃນກອງປະຊຸມ ບັນດາຜູ້ຕາງໜ້າສະຫະພັນບານເຕະແຕ່ລະແຂວງໄດ້ຂຶ້ນລາຍງານການປະຕິບັດວຽກງານໃນປີ 2022 ຜ່ານມາ ແລະກຳນົດທິດທາງແຜນການຕໍ່ໄປໃນປີ 2023.

ສະເພາະປີ 2022 ສະຫະພັນບານເຕະແຫ່ງຊາດລາວ ແມ່ນໃຫ້ສິດພຽງແຕ່ທີມຈາກລາວລີກ 1 ຈໍານວນ 7 ທີມເຂົ້າຮ່ວມການແຂ່ງຂັນເຕະບານ LFF LAO FORD CUP 2022 ເນື່ອງຈາກທີມຈາກລີກ 2 ຂອງແຕ່ລະແຂວງຍັງບໍ່ມີຄວາມພ້ອມເທື່ອ ແຕ່ຫຼ້າສຸດໄດ້ຂ່າວດີໃນປີໜ້າ ທີມຈາກລາວລີກ 2 ສາມາດມາແຂ່ງຂັນໄດ້ແລ້ວ ແລະ ຈະເຮັດໃຫ້ລາຍການນີ້ມີທີມເຂົ້າຮ່ວມແຂ່ງຂັນຫຼາຍກວ່າ 20 ທີມ.

Photo: ສະຫະພັນບານເຕະແຫ່ງຊາດລາວ Lao Football Federation

Leave a Reply

Your email address will not be published.