ຖືວ່າເປັນຂ່າວດ່ວນ ແລະ ເດັ່ນ ໃນວົງການບານເຕະລະດັບໂລກ ເມື່ອປະເທດອິນໂດເນເຊຍ ຖືກສະຫະພັນບານເຕະນາໆຊາດ ຫລື ຟີຟ້າ ຖອນສິດການເປັນເຈົ້າພາບ ເຕະບານຊາຍ ຊິງແຊ້ມໂລກ ຮຸ່ນອາຍຸບໍ່ເກີນ 20 ປີ (U-20 ) ທີ່ກຳລັງຈະເກີດຂຶ້ນໃນວັນທີ 20 ພຶດສະພາ – 11 ມິຖຸນາ ປີ 2023 ນີ້ ພາຍຫລັງມີເຫດການປະຊາຊົນໃນປະເທດປະທ້ວງການເຂົ້າຮ່ວມຂອງ ອິດສະຣາແອນ.
ກ່ອນໜ້ານີ້ ສະມາຄົມບານເຕະອິນໂດເນເຊຍ ໄດ້ປະກາດເລື່ອນການຈັບສະຫລາກຮອບແບ່ງກຸ່ມ ຮອບສຸດທ້າຍອອກໄປ ໃນວັນທີ 31 ມີນານີ້ ເນື່ອງຈາກອົງການປົກຄອງນະຄອນບາຫລີ ເມືອງເຈົ້າພາບ ໄດ້ແຈ້ງວ່າ: ມີປະຊາຊົນຈຳນວນຫລາຍສົມຄວນທີ່ນັບຖືສາສະໜາຮິນດູ ຮ່ວມກັນເດີນຂະບວນປະທ້ວງ ປະຕິເສດການເຂົ້າຮ່ວມຂອງທີມຊາດອິດສະຣາແອນ ທີ່ມີຄວາມຂັດແຍ່ງກັບປະເທດປາເລັສຕິນເລື່ອງສາສະໜາ ເຮັດໃຫ້ສ້າງຄວາມບໍ່ສະຫງົບ ແລະ ຍັງມີລາຍງານວ່າ: ປະຊາຊົນຈຳນວນໜຶ່ງຢູ່ນະຄອນຫລວງຈາກາຕ້າ ກໍຈະຮ່ວມກັນເດີນຂະບວນປະທ້ວງເລື່ອງນີ້ເຊັ່ນກັນ.
ຕໍ່ກັບບັນຫາດັ່ງກ່າວ ເຮັດໃຫ້ ສະຫະພັນບານເຕະນາໆຊາດ ຫລື ຟີຟ້າ ຈຶ່ງຕັດສິນໃຈຖອດສິດການເປັນເຈົ້າພາບຂອງອິນໂດເນເຊຍ ເຮັດໃຫ້ອິນໂດເນເຊຍ ພາດໂອກາດສ້າງປະຫວັດສາດເປັນເຈົ້າພາບລາຍການນີ້ຄັ້ງທຳອິດ ທັ້ງໆທີ່ວາງແຜນໄວ້ດົນສົມຄວນ ນັບຕັ້ງແຕ່ການຊະນະຊິງສິດເປັນເຈົ້າພາບໃນປີ 2019 ແລະ ຄາດຫວັງການເປັນເຈົ້າພາບເທື່ອນີ້ ຈະສ້າງຜົນປະໂຫຍດໃຫ້ແກ່ປະເທດຊາດ ເປັນຕົ້ນວຽກງານການທ່ອງທ່ຽວ ແລະ ກິລາ ແຕ່ໂອກາດນີ້ຫລຸດໄປຢ່າງໜ້າເສຍດາຍ.
FIFA removes Indonesia as host of FIFA U-20 World Cup 2023™
— FIFA Media (@fifamedia) March 29, 2023
ສ່ວນ ເຈົ້າພາບໃໝ່ ທີ່ຈະມາແທນອິນໂດເນເຊຍ ຟີຟ້າ ກຳລັງພິຈາລະນາ ແລະ ຈະປະກາດໃຫ້ຊາບໃນມໍ່ໆນີ້, ສຳລັບ ການແຂ່ງຂັນເຕະບານຊາຍ ຮຸ່ນອາຍຸບໍ່ເກີນ 20 ປີ ຊິງແຊ້ມໂລກ ຮອບສຸດທ້າຍໃນປີນີ້ ມີ 24 ທີມ ທີ່ຜ່ານການຄັດເລືອກແຕ່ລະຂົງເຂດ, ທີມອິດສະຣາແອນ ເຂົ້າມາຮອບສຸດທ້າຍໃນຖານະຮອງແຊ້ມ U-20 ປີ ຊິງແຊ້ມເອີຣົບຄັ້ງຫລ້າສຸດ ແລະ ເປັນໜຶ່ງໃນສອງນ້ອງໃໝ່ ທີ່ມາແຂ່ງຂັນ U-20 ປີ ຊິງແຊ້ມໂລກ ຮອບສຸດທ້າຍ ຄັ້ງທຳອິດ ຕໍ່ຈາກ ສາທາລະນະລັດ ໂດມີນີກັນ.
ສະໜັບສະໜູນການລາຍງານຂ່າວ: Evo Store – ອີໂວ ສະຕໍຣ໌
Photo: Fifa