ການແຂ່ງຂັນດອກປີກໄກ່ ລະດັບໂລກ BWF World Tour ຊຸບເປີ 1000 ລາຍການ All England Open 2023 ໃນທ້າຍອາທິດຜ່ານມາ ຊິງເງິນລາງວັນລວມ 1,250,000 ໂດລາສະຫະລັດ, ປະກົດວ່າມີແຊ້ມໜ້າໃໝ່ ປະເພດຊາຍດ່ຽວ, ຍິງດ່ຽວ, ຄູ່ຍິງ ແລະ ຄູ່ຊາຍ.
ປະເພດຊາຍດ່ຽວຮອບຊິງຊະນະເລີດ: ຫລີ ຊື້ເຟິງ ມື 14 ຂອງໂລກຈາກຈີນ ເອົາຊະນະ ສືຢູ້ສີ ມື 12 ຂອງໂລກ ເພື່ອນຮ່ວມຊາດລຸ້ນອ້າຍ 2-0 ເກມ: 26-24, 21-5 ໄດ້ແຊ້ມລາຍການນີ້ຄັ້ງທຳອິດ ແລະ ເປັນແຊ້ມລະດັບ Super 1000 ລາຍການທຳອິດໃນອາຊີບ.
ຂະນະທີ່ ປະເພດຍິງດ່ຽວ: ອັນເຊຢັງ ມື 2 ຂອງໂລກຈາກສາທາລະນະລັດເກົາຫລີ ເອົາຊະນະ ເສິນຢູ້ເຟີຍ ມື 4 ຂອງໂລກຈາກຈີນ 2-1 ເກມ: 21-17, 10-21 ແລະ 21-19 ໄດ້ແຊ້ມລາຍການນີ້ຄັ້ງທຳອິດ ແລະ ເປັນນັກກິລາດອກປີກໄກ່ຍິງດ່ຽວເກົາຫລີຄົນທຳອິດໃນຮອບ 27 ປີ ທີ່ໄດ້ແຊ້ມລາຍການນີ້ ຕໍ່ຈາກ ບັງຊູຮຸນ ໃນປີ 1996.
ສ່ວນແຊ້ມປະເພດຄູ່ຊາຍ ເປັນຂອງ ຟາຈ້າ ອາວຟຽນ ແລະ ມູຮຳໝັດ ຣຽນ ອາດຽນໂຕ້ ຄູ່ມື 1 ຂອງໂລກ ຈາກອິນໂດເນເຊຍ, ປະເພດຄູ່ຍິງ ແຊ້ມເປັນຂອງ ຄິມໂຊຢັງ ແລະ ຄ໋ອງຮີຢ໋ອງ ຈາກສາທາລະນະລັດເກົາຫລີ ຄູ່ມື 6 ຂອງໂລກ ແລະ ແຊ້ມປະເພດຄູ່ປະສົມເປັນຂອງຄູ່ມື 1 ຂອງໂລກຈາກຈີນ ເຈິ້ງຊື້ເຫວີຍ ກັບ ຫວງຢ້າຊົງ ໄດ້ແຊ້ມຕ່ໍຈາກປີ 2019.
ສະໜັບສະໜູນການລາຍງານຂ່າວ: Evo Store – ອີໂວ ສະຕໍຣ໌, https://www.facebook.com/evoltd
Photo: BWF