ຊົມເຊີຍ! ໄຊຊະນະ ມະນີຈັນ ນັກກິລາປິ່ງປ່ອງເຍົາວະຊົນລາວ ຄົນທຳອິດ ຄວ້າແຊ້ມປິ່ງປ່ອງເຍົາວະຊົນຊິງແຊ້ມລະດັບນາໆຊາດ

ໄຊຊະນະ ມະນີຈັນ ນັກກິລາປິ່ງປ່ອງເຍົາວະຊົນຊາຍ ຈາກ ສປປ ລາວ ໄວ 10 ປີ ກາຍເປັນນັກກິລາປິ່ງປ່ອງເຍົາວະຊົນລາວຄົນທຳອິດ ສາມາດຄວ້າແຊ້ມປິ່ງປ່ອງເຍົາວະຊົນ-ໄວໜຸ່ມຊິງແຊ້ມລະດັບນາໆຊາດ ລາຍການ WTT Youth Contender Doha 2023 ທີ່ນະຄອນຫລວງໂດຮາ ປະເທດກາຕ້າ ໃນລະຫວ່າງວັນທີ 27-30 ມັງກອນ 2023 ຜ່ານມາ.

ໄຊຊະນະ ມະນີຈັນ ຫລື ນ້ອງເຄນໂດ້ ຈາກສະໂມສອນດາລາວອນ ລົງແຂ່ງ 2 ລາຍການຄື: ຮຸ່ນອາຍຸບໍ່ເກີນ 11 ປີ ແລະ ບໍ່ເກີນ 13 ປີ, ໂດຍ ໄຊຊະນະ ມະນີຈັນ ສາມາດຄ້ວາແຊ້ມໃນຮຸ່ນອາຍຸບໍ່ເກີນ 11 ປີ ດ້ວຍຜົນງານຊະນະ ນັດລວດແບບບໍ່ເສຍເກມ, ຮອບແບ່ງກຸ່ມ ຊະນະ Youssef ABOUAHMED ຈາກເອຢິບ 3-0 ເກມ: 11-8, 11-4, 11-5, ຊະນະ Hamad AL-ABDULLA ຈາກເຈົ້າພາບກາຕ້າ 3-0 ເກມ: 11-2, 11-4, 11-1 ແລະ ຊະນະ Hamad AL SULAITI ອີກໜຶ່ງນັກກິລາຈາກເຈົ້າພາບ 3-0 ເກມ: 11-9, 11-5, 13-11.

ມາໃນຮອບຮອງຊະນະເລີດ ຫລື 4 ຄົນສຸດທ້າຍ ຊະນະ Rabeah AL-KUWARI ອີກໜຶ່ງນັກກິລາຈາກເຈົ້າພາບ 3-0 ເກມ: 11-2, 11-6, 11-8 ແລະ ຮອບຊິງຊະນະ Abinav PRASANNA ຈາກສະຫະລັດ ອາເມຣິກາ 3-0 ເກມ: 11-8, 11-6, 11-2 ຄວ້າແຊ້ມມາຄອງຢ່າງສະຫງ່າງາມ.

ສ່ວນ ຮຸ່ນອາຍຸບໍ່ເກີນ 13 ປີ ໄຊຊະນະ ມະນີຈັນ ຜົນງານດີສົມຄວນ ໃນຮອບແບ່ງກຸ່ມ ຊະນະ 2 ເສຍ 1 ເຂົ້າຮອບ 8 ຄົນສຸດທ້າຍ ແຕ່ມາເສຍໃຫ້ນັກກິລາຈາກເລບານອນ 1-3 ເກມ: 12-14, 9-11, 11-5, 10-12.

ອີກໜຶ່ງນັກກິລາລາວທີ່ເຂົ້າຮ່ວມແຂ່ງຂັນລາຍການນີ້ຄື: ທ້າວ ອານັນ ວົງສາ ຫລື ນ້ອງ ກອບປີ້ ໄວ 16 ປີ ຈາກສະໂມສອນ SV ສຶກສາລົງແຂ່ງໃນຮຸ່ນນອາຍຸບໍ່ເກີນ 17 ປີ ຜົນງານກໍດີສົມຄວນ ຜ່ານຮອບແບ່ງກຸ່ມ ດ້ວຍຜົນງານ ຊະນະ 1 ເສຍ 2 ຮອບ 32 ຄົນ ຜ່ານນັກກິລາເຈົ້າພາບ 3-2 ເກມ, ແຕ່ມາຕົກຮອບ 16 ຄົນສຸດທ້າຍ ເສຍໃຫ້ນັກກິລາຈາກສາທາລະນະລັດເກົາຫລີ 0-3 ເກມ: 6-11, 5-11, 5-11. ຈາກນັ້ນ ອານັນ ວົງສາ ລົງແຂ່ງໃນຮຸ່ນນອາຍຸບໍ່ເກີນ 19 ປີ ຕົກຮອບແບ່ງກຸ່ມ ເສຍ 3 ນັດລວດ ແຕ່ຖືວ່າເສຍຄະແນນບໍ່ຂາດຫລາຍ.

ຈາກການເຂົ້າຮ່ວມຄັ້ງນີ້ ເຫັນໄດ້ວ່າ: ນັກກິລາມີພັດທະນາການທີ່ດີຂຶ້ນ, ມີຈິດໃຈທີ່ເຂັ້ມແຂງ ແລະ ມີຄວາມກ້າ ເປັນນິມິດໝາຍອັນດີ ເພື່ອກັບມາສືບຕໍ່ຝຶກແອບ ແລະ ພັດທະນາຕົນເອງຕໍ່ໄປ, ສິ່ງສຳຄັນຄືການສ້າງໂອກາດໃຫ້ນັກກິລາໄດ້ເຄື່ອນໄຫວຝຶກແອບ ແລະ ແຂ່ງຂັນຢ່າງຕໍ່ເນື່ອງທັງພາຍໃນ, ພາກພື້ນ ແລະ ສາກົນ ເພື່ອພັດທະນາສີມື ຍົກລະດັບຄວາມສາມາດ, ປະຈຸບັນ ນັກກິລາຍັງຂາດດ້ານງົບປະມານໃນການເດີນທາງໄປແຂ່ງຂັນທົດສອບສີມື ແລະ ເກັບຄະແນນລະດັບໂລກ ຫາກພາກສ່ວນໃດສົນໃຫ້ການສະໜັບສະໜູນ ຕິດຕໍ່ທາງສະຫະພັນປິ່ງປ່ອງແຫ່ງຊາດລາວໄດ້ ເພື່ອພັດທະນານັກກິລາລາວກ້າວສູ່ສາກົນ.

Photo: Lao Table Tennis Federation

Leave a Reply

Your email address will not be published. Required fields are marked *