ງານກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ໄດ້ຮັບກຽດເປັນເຈົ້າພາບຄັ້ງທຳອິດ ນັບແຕ່ວັນທີ 1-22 ທັນວາ 2022 ນີ້, ກຸ່ມຜູ້ຜະລິດຜືດຜັກກະສິກຳອິນຊີ ເມືອງແປກ ໜຶ່ງໃນເມືອງເຈົ້າພາບ ສະແດງຄວາມຮູ້ສຶກດີໃຈ ແລະ ພູມໃຈ ທີ່ຈະໄດ້ປະກອບສ່ວນສະໜອງພືດຜັກປອດສານພິດ ໃຫ້ແກ່ງານກິລາແຫ່ງຊາດຄັ້ງນີ້.
ທ່ານ ນາງ ບົວຈັນ ເຮືອງວິໄລ ຕາງໜ້າສະຫະກອນກຸ່ມຜູ້ຜະລິດກະສິກຳອິນຊີ ເມືອງແປກ ແຂວງຊຽງຂວາງ ໄດ້ໃຫ້ຮູ້ວ່າ: ໃນໂອກາດທີ່ແຂວງຂຽງຂວາງ ໄດ້ຮັບກຽດເປັນເຈົ້າພາບ ກິລາແຫ່ງຊາດ ຄັ້ງທີ 11 ລວມທັງງານສະເຫລີມສະຫລອງທົ່ງໄຫຫີນ ເປັນມໍລະດົກໂລກແຫ່ງທີ 3 ຂອງ ສປປ ລາວ, ການສະເຫລີມສະຫລອງພະເຈົ້າອົງຫລວງປາງປະທານພອນ ແລະ ບຸນກິນຈຽງ ພີ່ນ້ອງເຜົ່າມົ້ງ ໃນທ້າຍປີນີ້ ສະຫະກອນກຸ່ມຜູ້ຜະລິດກະສິກຳອິນຊີ ເມືອງແປກ ແມ່ນສຸດທີ່ດີໃຈທີ່ມີສ່ວນຮ່ວມໃນການຮັບໃຊ້ບັນດາງານສຳຄັນຄັ້ງນີ້ ແລະ ມີຄວາມພ້ອມແລ້ວ ທີ່ຈະເພີ່ມກຳລັງການຜະລິດ ເພື່ອສະໜອງພຶດຜັກອິນຊີປອດສານເຄມີໃຫ້ແກ່ແຂກນັກທ່ອງທ່ຽວ ແລະ ຄະນະນັກກິລາທີ່ຈະມາຮ່ວມງານຊຽງຂວາງເກມເທື່ອນີ້.
ຍ້ອນໄດ້ຮັບການຊີ້ນຳ-ນຳພາ ແລະ ຊຸກຍູ້ສະໜັບສະໜູນຢ່າງໃກ້ຊິດຈາກພາກລັດ ກໍຄືພະແນກກະສິກຳ ແລະ ປ່າໄມ້, ຫ້ອງການກະສິກຳ ແລະ ປ່າໄມ້ ເມືອງແປກ ແຂວງຊຽງຂວາງ ຈຶ່ງເຮັດໃຫ້ຊາວກະສິກອນຜູ້ຜະລິດພືດຜັກອິນຊີ ຮູ້ຈັກເຕັກນິກ, ວິທີການປູກ, ການບົວລະບັດຮັກສາ, ການເຮັດຝຸ່ນ ທີ່ບໍ່ນຳໃຊ້ສານເຄມີ, ບໍ່ນຳໃຊ້ຢາປາບສັດຕູພືດ ເພື່ອຄຳນຶງເຖິງສຸຂະພາບຜູ້ຜະລິດ ແລະ ຜູ້ບໍລິໂພກ ລວມທັງບໍ່ສົ່ງຜົນກະທົບຕໍ່ສິ່ງແວດລ້ອມ ແລະ ສິ່ງມີຊີວິດອື່ນໆ.
ປະຈຸບັນ ກຸ່ມຜະລິດກະສິກຳອິນຊີ ເມືອງແປກ ແມ່ນມີ 90 ກວ່າຄອບຄົວ, ມີພະນັກງານຊີ້ນຳສະຫະກອນ 2 ທ່ານ, ຄະນະບໍລິຫານ 7 ທ່ານ ເປັນແມ່ຍິງທັງໝົດ.
ປະຈຸບັນ ຜືດຜັກກະສິກຳອິນຊີປອດສານເຄມີ ໄດ້ຮັບຄວາມນິຍົມຫລາຍຂຶ້ນເລື້ອຍໆ ກວມຫລາຍກວ່າ 30% ຍ້ອນມີຜົນປະໂຫຍດຕໍ່ຮ່າງກາຍ ເຮັດໃຫ້ສຸຂະພາບດີ ທາງພາກລັດຈຶ່ງໄດ້ຈັດສັນບ່ອນຈຳໜ່າຍໃຫ້ແກ່ສະຫະກອນກຸ່ມຜູ້ຜະລິດກະສິກຳອິນຊີ ໂດຍໃຫ້ວາງຂາຍຢູ່ຕະຫລາດ ສີບຸນເຮືອງ ເທດສະບານເມືອງແປກ ໃນວັນພຸດ ແລະ ວັນເສົາ ແລະ ໃນໄລຍະການແຂ່ງຂັນກິລາແຫ່ງຊາດ ຄັ້ງທີ 11 ລະຫວ່າງວັນທີ 13-22 ທັນວາ 2022 ນີ້ ທາງກຸ່ມຜູ້ຜະລິດກະສິກຳອິນຊີ ຈະນຳເອົາຜືດຜັກປອດສານພິດມາວາງຂາຍຕະຫລອດງານ.