ມາເບິ່ງ 3 ກຳມະການເພດຍິງ ຄັ້ງທຳອິດ ໃນບານໂລກ 2022

ການແຂ່ງຂັນເຕະບານຊາຍ ຊິງແຊ້ມໂລກ ຄັ້ງທີ 22 ຫລື ບານໂລກ 2022 ທີ່ປະເທດກາຕ້າ ເປັນເຈົ້າພາບ ໃນລະຫວ່າງວັນທີ 20 ພະຈິກ ຫາວັນທີ 18 ທັນວານີ້ ມີ 3 ກຳມະການເພດຍິງ ຄັ້ງທຳອິດ ໄດ້ຮ່ວມຕັດສິນໃນປະຫວັດສາດຂອງການແຂ່ງຂັນບານໂລກເພດຊາຍ ປະກອບມີ: ສະເຕຟານີ້ ຟັບປາ ຊາວຝຣັ່ງ, ຊາລີມ້າ ມູການຊານກ້າ ຊາວຣາວັນດ້າ ແລະ ໂຢຊິມິ ຢາມາຊິຕະ ຊາວຍີ່ປຸ່ນ.

ສຳລັບ ສະເຕຟານີ້ ຟັບປາ ຊາວຝຣັ່ງ ຜູ້ຕັດສິນຍິງແກ່ນ ໄວ 38 ປີ ເປັນຜູ້ຕັດສິນຟີຟ້າ ປີ 2009 ມີປະສົບການຕັດສິນລະດັບລີກຝຣັ່ງມາແຕ່ປີ 2011 ທັງລີກສູງສຸດເພດຍິງ ແລະ ເພດຊາຍ ເປັນຜູ້ຕັດສິນຍິງຄົນທຳອິດໄດ້ຕັດສິນເຕະບານຊາຍ ລີກສູງສຸດຂອງຝຣັ່ງ ລວມທັງລະດັບໂລກອີກຫລາຍລາຍການ ເປັນຕົ້ນ ເຕະບານຍິງຊິງແຊ້ມໂລກ ແລະ ເອີຣົບ, ຢູຟ້າ ຊຸບເປີຄັບ ເພດຊາຍ, ຢູຟ້າ ແຊ້ມປ້ຽນລີກ ເພດຊາຍ, ເພດຍິງ, ເປັນຜູ້ຕັດສິນຍິງຄົນທຳອິດໄດ້ຕັດສິນເຕະບານຊາຍລະດັບສະໂມສອນໃນທະວີບເອີຣົບ.

ບານໂລກ 2022 ທີ່ປະເທດກາຕ້າ ສະເຕຟານີ້ ຟັບປາ ໄດ້ຮ່ວມຕັດສິນມາແລ້ວ 2 ນັດ ເປັນຜູ້ຊ່ວຍຜູ້ຕັດສິນທ່ານທີ 4 ນັດທີ່ ທີມຊາດເມັກຊິໂກ້ ພົບ ໂປໂລຍ ແລະ ປັອກຕຸຍການ ພົບ ການ້າ ແລະ ຈະໄດ້ເປັນຜູ້ຕັດສິນກາງສະໜາມລະຫວ່າງ ຄັອສຕາຣິກາ ພົບ ເຢຍລະມັນ ວັນທີ 1 ທັນວານີ້ ໂດຍຈະກາຍເປັນຜູ້ຕັດສິນຍິງຄົນທຳອິດໄດ້ຕັດສິນກາງສະໜາມ ໃນບານໂລກເພດຊາຍ.

ສ່ວນ ໂຢຊິມິ ຢາມາຊິຕະ ຊາວຍີ່ປຸ່ນ ຜູ້ຕັດສິນຍິງ ໄວ 36 ປີ ໃນບານໂລກ 2022 ໄດ້ຮ່ວມຕັດສິນມາແລ້ວ 4 ນັດ ເປັນຜູ້ຊ່ວຍຜູ້ຕັດສິນທ່ານທີ 4 ນັດທີ່ ທີມຊາດແບນຊິກ ພົບກັບ ການາດ້າ, ອັງກິດ ພົບ ສະຫະລັດ ອາເມຣິກາ, ແບນຊິກ ພົບ ໂມຣັອກໂຄ ແລະ ເວວ ພົບ ອັງກິດ. ຢາມາຊິຕະ ເປັນຜູ້ຕັດສິນຟີຟ້າ ປີ 2015 ເຄີຍໄດ້ສິນລະດັບລີກສູງສຸດຂອງຍີ່ປຸ່ນ, ບານໂລກເພດຍິງ, ໂອແລມປິກ ແລະ ເອເອຟຊີ ແຊ້ມປ້ຽນລີກ ເພດຊາຍມາແລ້ວ.

ຂະນະທີ່ ຊາລີມ້າ ມູການຊານກ້າ ຜູ້ຕັດສິນຍິງ ໄວ 34 ປີ ຊາວຣາວັນດ້າ ເປັນຜູ້ຕັດສິນຟີຟ້າ ປີ 2012 ປະສົບການຜ່ານມາ ເຄີຍເປັນຜູ້ຕັດສິນເຕະບານຍິງຊິງແຊ້ມໂລກ, ໂອແລມປິກ, ແຊ້ມປ້ຽນລີກ ອາຟຣິກາ ແລະ African Cup of Nations ເພດຊາຍມາແລ້ວ. ບານໂລກ 2022 ໄດ້ຮ່ວມຕັດສິນມາແລ້ວ 1 ນັດ ເປັນຜູ້ຊ່ວຍຜູ້ຕັດສິນທ່ານທີ 4 ນັດທີ່ ທີມຊາດຝຣັ່ງ ພົບ ອົດສະຕຣາລີ.

Photo: FIFA

Leave a Reply

Your email address will not be published. Required fields are marked *