ແອັສຕັນ ວິນລ້າ ແຕ່ງຕັ້ງ ອູໄນ ເອເມຣີ້ ເປັນຜູ້ຈັດການທີມ ແທນທີ່ ສະຕີເວັນ ເຈີຣາດ

ແອັສຕັນ ວິນລ້າ ສະໂມສອນບານເຕະເກົ່າແກ່ໃນອັງກິດ ປະກາດແຕ່ງຕັ້ງ ອູໄນ ເອເມຣີ້ ຜູ້ຈັດການທິມຊາວແອັສປາຍ ໄວ 50 ປີ ອະດີດຄູຝຶກ ອາຣເຊນໍລ ແລະ ປາຣີ ແຊັງແຊກແມັງ ເປັນຜູ້ຈັດການທີມໃໝ່ຂອງສະໂມສອນ ແທນທີ່ ສະຕີເວັນ ເຈີຣາດ ທີ່ຖືກປົດອອກຈາກຕຳແໜ່ງ ພາຍຫລັງພາທີມບຸກເສຍໃຫ້ ຟູແລ່ມ 0-3 ເກມພຣີເມ່ຍລີກ ເມື່ອຄືນວັນທີ 20 ຕຸລາຜ່ານມາ, ພາທີມຈົ່ມຢູ່ທ້າຍຕາຕະລາງ.

ວິນລ້າ ຈ່າຍຄ່າຈີກສັນຍາຂອງ ເອເມຣີ້ ກັບ ບີຢາຣຽວ ເພື່ອດຶງມາຄຸມທີມ 5.2 ລ້ານປອນ ເພາະສັນຍາຂອງ ເອເມຣີ້ ຈະໝົດກັບທັບເຮືອດຳນໍ້າຫລັງຈົບລະດູການໜ້າ, ເອເມຣີ້ ຈະເຂົ້າມາຄຸມ ວິນລ້າ ທາງການໃນວັນທີ 1 ພະຈິກທີ່ຈະມາເຖິງນີ້ ຫລັງເອກະສານຍົກຍ້າຍສຳເລັດ.

ເອເມຣີ້ ເປັນຄູຝຶກທີ່ມີປະສົບການສູງ ເຄີຍຄຸມຫລາຍທີມດັງ ເປັນຕົ້ນ: ບາເລັນເຊຍ, ສະປາຕັກ ມັອສໂຄ, ເຊບີຢ້າ, ປາຣີ ແຊັງແຊກແມັງ, ອາຣເຊນໍລ ແລະ ບີຢາຣຽວ. ລະດູການຜ່ານມາ ພາທັບເຮືອດຳນໍ້າ ເຂົ້າເຖິງຮອບ 4 ທີມສຸດທ້າຍ ຢູຟ້າ ແຊ້ມປ້ຽນລີກ ພ້ອມກັນພາທີມ ໄດ້ແຊ້ມ ຢູໂຣປ້າລີກ ລະດູການ 2020–21, ຄຸມ ອາຣເຊນໍລ ເຂົ້າຊິງ ຢູໂຣປ້າລີກ ລະດູການ 2018–19, ຄຸມ ເຊບີຢ້າ ໄດ້ແຊ້ມ ຢູໂຣປ້າລີກ 3 ສະໄໝຕິດຕໍ່ກັນ ແລະ ຄຸມ ປາຣີ ແຊັງແຊກແມັງ ໄດ້ແຊ້ມຄົບທຸກລາຍການໃນຝຣັ່ງເຊັ່ນ: ລີກອ໋ອງ, ຄຸບເດີຟຣອງ, ຄຸບເດີລາລີກ ແລະ ຊຸບເປີຄັບຝຣັ່ງ ລວມແລ້ວຄຸມທີມຫລາຍກວ່າ 900 ນັດ.

Photo: Aston Villa FC

Leave a Reply

Your email address will not be published.