ສະຫະພັນ ກິລາອັອຟໂຣດ ນະຄອນຫລວງ ພ້ອມກັບສະມາຊິກ ເດີນທາງໄປທ່ອງທ່ຽວເມືອງເຟືອງ ແລະ ເມືອງວັງວຽງ ແຂວງວຽງຈັນ ເພື່ອສົ່ງເສີມການທ່ອງທ່ຽວລາວ

ເພື່ອເປັນການສົ່ງເສີມການທ່ອງທ່ຽວລາວ ກໍຄືການໂຄສະນາ ປະຊາສຳພັນ ແລະ ເຜີຍແຜ່ ສະຖານທີ່ທ່ອງທ່ຽວທີ່ສວຍສົດງົດງາມ ມີເອກະລັກສະເພາະໃນຜືນແຜ່ນດິນລາວ ໂດຍສະເພາະສະຖານທີ່ທ່ອງທ່ຽວທາງທຳມະຊາດ ຢູ່ເມືອງເຟືອງ ແລະ ເມືອງວັງວຽງ ແຂວງວຽງຈັນ ທີ່ກຳລັງລືຊື່ໃນປະຈຸບັນ, ທາງສະຫະພັນ ກິລາອັອຟໂຣດ ນະຄອນຫລວງວຽງຈັນ ຮ່ວມກັບສະມາຊິກ ຈຶ່ງໄດ້ຈັດກິດຈະກຳ ຄາລະວານລົດ ອັອຟໂຣດ ທ່ອງທ່ຽວລາວ ໃນເທື່ອນີ້ ເພື່ອກະຕຸ້ນການທ່ອງທ່ຽວລາວໃຫ້ກວ້າງຂວາງ ແລະ ກັບມາຟົດຟື້ນອີກຄັ້ງ ພາຍຫລັງສະພາບການລະບາດຂອງພະຍາດໂຄວິດ-19 ດີຂຶ້ນ.

ທ່ານ ວິຣະໄຊຄຳ ພິລາພັນເດຊ ປະທານສະຫະພັນ ກິລາອັອຟໂຣດ ນະຄອນຫລວງວຽງຈັນ ແລະ ທ່ານ ບຸນຮຽງ ແກ້ວວິຫານ ຮອງປະທານສະຫະພັນ ກິລາອັອຟໂຣດ ນະຄອນຫລວງ ກ່າວວ່າ: ກິດຈະກຳ ຄາລະວານລົດ ອັອຟໂຣດ ທ່ອງທ່ຽວລາວ ຄັ້ງນີ້ ມີລົດເຂົ້າຮ່ວມຫລາຍກວ່າ 50 ຄັນ ທີ່ມາຈາກສະຫະພັນອັອຟໂຣດນະຄອນຫລວງ, ສະໂມສອນຊ້າງປ່າອັອຟໂຣດ, ສະໂມສອນ ຮ່ວມໃຈ ອັອຟໂຣດ, ບີບີ ໂອໂຕຊ໋ອບ, ສະໂມສອນ ຢູ່ຢ່າງສິງ ອັອຟໂຣດ ແລະ ສະໂມສອນ ແຂວງວຽງຈັນ ອັອຟໂຣດ. ຈະເດີນທາງເປັນເວລາ 3 ວັນ ຄືວັນທີ 21-23 ຕຸລາ 2022 ເຊິ່ງຕອນທ່ຽງ ວັນທີ 21 ຕຸລາ ລວມໂຕກັນຢູ່ເດີນພະທາດຫລວງ ແລະ ອອກເດີນທາງມຸ້ງຫນ້າສູ່ເມືອງເຟືອງ ຂື້ນທາງດ່ວນ ແລະ ຄາດວ່າ ຈະຮອດເມືອງເຟືອງ ເວລາປະມານ 16:00 ເຂົ້າຈຸດພັກຜ່ອນຕາມແຫລ່ງທ່ອງທ່ຽວເມືອງເຟືອງ ແລະ ພັກຜ່ອນຕາມອັດທະຍາໃສ.

ຈາກນັ້ນ ວັນທີ 22 ຕຸລາ ເວລາ 7 ໂມງເຊົ້າ ກຽມອາຫານປັ້ນເຂົ້າເຊົ້າ ແລະ ເຮັດອາຫານເພື່ອຕອນບ່າຍ ເວລາ 9:00 ອອກເດີນທາງມຸ້ງສູ່ເສັ້ນທາງທຳມະຊາດ ເມືອງເຟືອງ ຫາ ເມືອງວັງວຽງ ໂດຍກຳເວລາຊອດອອກເມືອງວັງວຽງ ບ້ານນ້ຳແປ, ຫລັງຈາກນັ້ນ ມື້ທີສາມ ວັນທີ 23 ຕຸລາ ຕອນເຊົ້າກຽມອາຫານ ປັ້ນເຂົ້າເຊົ້າ ແລະ ເດີນທາງທ່ຽວຊົມສະຖານທີ່ທ່ອງທ່ຽວຕ່າງໆຂອງເມືອງວັງວຽງ, ເວລາ 16:00 ເດີນທາງກັບນະຄອນຫລວງວຽງຈັນ ໂດຍໃຊ້ທາງດ່ວນ.

ການເດີນທາງຄັ້ງນີ້ ເກີດຂຶ້ນໄດ້ຍ້ອນຄວາມຮັກແພງ ສາມັກຄີ ຂອງບັນດາສະມາຊິກ ພ້ອມໃຈກັນຮ່ວມສົ່ງເສີມການທ່ອງທ່ຽວລາວ ເພື່ອກະຕຸ້ນເສດຖະກິດ ກະຈາຍລາຍໄດ້ສູ່ຊຸມຊົນ ເຊິ່ງການທ່ອງທ່ຽວ ເປັນໜຶ່ງໃນຂະແໜງຍຸດທະສາດ ທີ່ເປັນເສົາຄ້ຳຫລັກ ໃນການພັດທະນາເສດຖະກິດ-ສັງຄົມຂອງປະເທດ, ສາມາດນຳລາຍໄດ້ເປັນເງິນຕາເຂົ້າປະເທດຢ່າງຫລວງຫລາຍ, ພ້ອມທັງກະຕຸກຊຸກຍູ້ ໃຫ້ຂະແໜງການອື່ນໆ ມີການຂະຫຍາຍຕົວ ແລະ ພັດທະນາໄປພ້ອມໆກັນ.

Leave a Reply

Your email address will not be published.